Armagintza enpresekin "egunera jartzeko", Espainiako Defentsa Ministerioak 1.783 milioi euroko kreditua jasoko du
Espainiako Defentsa Ministerioak armagintza enpresekin dituen zorrak kitatzeko, alegia, kontuak "egunera jartzeko", Kongresuak 1.783 milioi euroko aparteko kreditua ematea erabaki du, PPren eta UPNren aldeko botoekin.
Kreditua hainbat faktura ordaintzeko baliatuko du Defentsa Ministerioak. Helikopteroak, guda-ontziak eta tankeak daude ordaindu gabekoen zerrendan, besteak beste. Pedro Morenes ministroaren hitzetan, "bezero eta bazkide" bezala, kreditua lagungarria izango da Espainiak sinesgarritasuna berreskuratu dezan. "Defentsaren industria beharrezkoa da eta aberastasuna sortzen du", gehitu du.
Oposizioko alderdiek erabakia kritikatu dute, hura onartzeko formengatik bereziki. Diego Lopez Garrido PSOEko bozeramaileak adibidez esan du inor ez dela "ez ordaintzeaz hitz egiten ari". Gobernuaren lehentasunen inguruan azaldu du desadostasuna: "Gizarte politiketarako ez dago dirurik, eta armagintzarentzat bai". Termino beretsuetan hitz egin du EAJko kide Arantxa Tapiak. "Bizi dugun egoera zaila" aintzat hartuta, erabakiaren egokitasuna zalantzan jarri du. Pasa den astean, kredituari buruzko iritzia ematean, Tapiak erabakia defendatu zuen, Defentsan inbertitzeak "eragina duelako gizarte zibilean".
Kazetaritza independentea eta profesionala egiten dugu, euskaraz eta euskaldunontzat.