Gaur eman diote hasiera izenpe bilketa kanpainari, Gasteizen egindako agerraldi publiko batean. Bide batez, kanpainaren koordinazio gunea izango dena ireki dute: frackingaren aurkako bulegoa. Fracking Ez izeneko plataforma arduratuko nola bulegoa kudeatzeaz hala sinadura bilketa sustatzeaz; EAEn haustura hidraulikoaren aurka diharduten talde guztiek bat egin dute kolektibo horretan.

Kanpainaren berri emango duen webgunea ere aurkeztu dute: http://frackingez.org/eu. Besteak beste, sinatzeko egun eta lekuak iragarriko dituzte bertan. Lehen izenpeak gaurko arratsaldeko 19:00etan jasoko dituzte, frackingaren aurkako bulegoan bertan eta jai giroan.

HELa bultzatzeko ez ezik, Fracking Ez kolektiboak haustura hidraulikoak dakarren mehatxuaz ohartarazteko baliatu nahi du sinadura bilketa kanpaina. Bestalde, uste dute alderdi politiko guztiak gaiaz zein jarrera duten argiro adieraztera behartuko dituztela, "hainbatek ez baitu orain arte behar bezain argi azaldu".

Fracking Ez-en helburua da Araba, Bizkaia eta Gipuzkoako lurretan hidrokarburo ez-konbentzionalen esplorazioa, ikerketa eta ustiaketa debekatzea. Baita haustura hidrauliko teknika zernahitarako erabiltzea ere. Gaurko agerraldian adierazi dutenez, “frackingak bizirik dirau gobernu eta enpresen agendetan”, azken aldian hari buruzko albisteak urritu badira ere. “Ikerketa baimenak eta frackingaren bitartez egingo diren putzuen eskaerak mahai gainean daude”, gehitu dute; “lehen putzuetarako ingurumen txostenak Madrilen daude, eta Ingurumen Inpaktuen Adierazpenen zain daude zulatzaileak. Dirudienez, 2014 amaieran edo 2015 hasieran izango dituzte Madrileko baimenak, ingurumenari dagozkionak, eta horren ondoren zulatzen hasteko asmotan daude”.

Sinadura bilketarako erabiliko den dokumentua osorik, legearen testua barne (euskaraz eta gaztelaniaz, pdf)