Lopezen "luzimendua" Europar Batasunean

Gaur amaituko da Donostian Europar Batasuneko (EB) Berrikuntza eta Lehiakortasun Ministroen Kontseilu informala. Donostiako Aitorpena atera da bertatik. EAEko lehendakari Patxi Lopezen arabera “aukera historikoa izan da europarren interesa erakartzeko eta Euskadi luzitzeko berrikuntzan, energia berriztagarrietan, auto elektrikoan baita sukaldaritzako berrikuntzan ere”. Lopezek ondo daki “Euskadi”, eta are gutxiago Euskal Herria, ez dela egon presente europar Ministroen Kontseiluan. “Euskadik” eta Lopezen Gobernuak, hala nola Donostiako alkatetzak, egin duten gauza bakarra izan da Donostian izan diren europar ministroen afaria eta beste ekitaldi batzuk gure poltsikoetatik ordaintzea.

Euskal diasporari buruzko erakusketa New Yorken

New Yorkeko Ellis Island irlan Hidden in Plain Sight: the Basques (Begi bistan ezkutatuta: euskaldunak) izenburuko erakusketa zabaldu dute XIX. mende bukaeran eta XX. hasieran AEBetara emigratutako euskaldunei eta Euskal Herriari buruz. Euskal kultura eta jendeari buruzko argazkiak, ikus-entzunezkoak, objektuak eta arte-lanak bisitatu ahal izango dira maiatzaren 9a arte.

"Al Jazeera-rekin konfiantzazko harremana dut"

"Montaser Marai, Al Jazeera Documentary Channel kateko arduradun palestinarrak kontaktatu ninduen Granadako Festibalean. Nire ibilbidea ezagutzen zuen eta Granadako tabernetan lagun-giroan amaitu genuen. [Checkpoint Rock] dokumentala erosi zuten telebista katean emateko, Dubaiko Festibalean elkar ikusteko proposamena luzatu zidan, eta azkenean kateak Qatarren duen egoitzan bildu ginen. (...) [13 dokumental eskatu zizkidatenean] bertigoa sartu zitzaidan. (...) Musika arabiarrari buruzko serie baterako lan eta finantza akordioa negoziatzen ibili ginen: 13 kapitulu izango ditu: bi Libanon, eta bana Marokon, Aljerian, Egipton, Kuwaiten, [Arabiar] Emirerrietan, Omanen, Yemenen, Sirian, Tunisian eta Sudanen. (...) Ekaina bitartean joan-etorrian ibiliko gara, eta eskolak amaitzen direnean, emaztearekin eta bi seme-alabekin Beiruta joango gara. (...) Arabiarra estereotipatua eta hermetikoa iruditzen zaigu, orain gauza berriak ikasteko aukera ona dugu".(2010-02-09)

Euskarabideak D ereduaren aldeko kanpaina bertan behera utzi du

Azalpenik eman gabe bertan behera utzi ditu Euskarabideak Nafarroan prestatuta zituen bi kanpaina, Administrazioan Euskaraz taldeak prentsa ohar bidez salatu duenez. Bata, D ereduaren aldeko matrikulazioa sustatzen zuena; eta bestea, Administrazioan banatzeko euskaraz egindako materialarena.

Agirregomez familia (oin-ohar bat alienazioaren historiarako)

Juan Agirregomezek 14 ordu sartzen zituen egunero metal enpresa handi batean, igandeetan izan ezik. Lan urdinez jantzitako gizon gordina, etxera bueltatzean bakarrik eranzten zuen buzoa. Behin, izerdi eta neke artean, norbaitek “alienatuta” bizi zela esan zion, eta horrek goitik behera aldatu zion beharrari buruzko ikuspegia. Sindikatu klandestinoan sartu zen, eta erretreta hartu arteko urteak pasa zituen borrokan: lan denbora alienatzailea gutxitzeko borrokan, ahalik eta plusbalio gehiena lankideei itzultzeko borrokan.

Irakurri –eta entzun– artikulu osoa Boligrafo Gorria blogean.

Alberto Schommer argazkilariari buruzko erakusketa Bilboko Arte Eder museoan

[Alberto Schommer argazkilari gasteiztarraren atzera begirakoa ireki du Bilboko Arte Eder museoak, maiatzaren 16a arte]

"Artea ez dago munduan gertatzen diren gauzetatik aparte. (...) Horregatik, min egiten didate zenbait gertakarik. Gauzak bestela joatea beharko nuke. Eta bestela joango balira, artea bera ere oso bestela joango litzateke. (...) Zerbait eraikitzea da nire helburua, eta horretarako zenbait gauza suntsitzen ditut, eta beste batzuk sortu. Pertsonen eta eraikinen zirrikituak bilatzen ditut, betiere komunikazioa lortzeko asmoz. Aurrena neure buruarekin; eta ondoren, gainerakoekin (...) Argazkilaritzan eman nezakeen guztia eman dut". (2010-02-09)

[Irakurri Alberto Schommer-i 2004an Argian egindako elkarrizketa]